Yangiliklar

Bugun Bojxona qoʻmitasining Milliy kinologiya markazida Milliy gvardiya qoʻmondonligi, Bojxona qoʻmitasi rahbariyati, shuningdek, Rossiya Federatsiyasi, Xitoy, Belarus va Qozogʻiston respublikalari huquqni muhofaza qiluvchi organlar xodimlari hamda kinolog-mutaxassislar ishtirokida Milliy gvardiya kinolog-mutaxassislarining xizmat koʻpkurashi boʻyicha ochiq musobaqasining tantanali taqdirlash marosimi boʻlib oʻtdi.
Dastlab "Toʻsiqlarni yengib oʻtish", "Umumiy tayyorgarlik", "Xizmat biatloni", "Eng yaxshi kinolog-mutaxassis" va "Eng yaxshi 4 oyoqlik doʻst" yoʻnalishlarida gʻoliblar aniqlandi.
Yakuniy natijalarga koʻra umumjamoa hisobida faxrli 1 oʻrinni Oʻzbekiston Respublikasi Milliy gvardiyasi "Qoʻriqlash" bosh boshqarmasi jamoasi, 2 oʻrinni Belarus Respublikasi, 3 oʻrinni Xitoy Xalq Respublikasi jamoasi qoʻlga kiritdi.
Eslatib oʻtamiz, musobaqada 12 ta jamoadan 27 nafar ishtirokchi oʻz mahoratlarini namoyish etgan holda, 5 kun davomida shartli jinoyatchini ushlash, umumiy mashq, xizmat biatloni, iz qidiruv hamda toʻsiqlarni yengib oʻtish shartlarida bellashishdi.