Янгиликлар

Жорий йилнинг 23-27 сентябрь кунлари ҳудудий Қўриқлаш бошқармалари Ахборот хизматлари ходимлари иштирокида "Қўриқлаш" бошқармалари Ахборот хизматлари ходимлари иштирокида “Миллий гвардия фаолиятида очиқлик ва шаффофлик. Матбуот соҳасида миллий ва хорижий тажриба. Фейк маълумот ҳамда дезинформацияларда ижтимоий тармоқлар ва платформалардаги имкониятлар, сунъий интеллектнинг миллий контент яратишда тутган ўрни” мавзусида ўқув йиғини бўлиб ўтди.
Йиғилишда Миллий гвардия фаолиятини оммага тўғри ва сифатли етказишнинг долзарб масалалари муҳокама қилинди. Айниқса, очиқлик ва шаффофлик тамойилларини жорий этиш орқали давлат органларининг жамоатчилик билан алоқаларини кучайтириш муҳим эканлиги таъкидланди.
Миллий ва хорижий тажрибалар мисолида, ахборот хизматлари ходимларига давлат органлари фаолияти ҳақидаги ахборотни қандай тарзда очиқ, холис ва тезкор тарзда тақдим қилиш, фейк хабарларга қарши самарали курашиш услублари ҳақида маълумот берилди. Қатнашчилар хорижий давлатларнинг ахборот хавфсизлиги соҳасидаги илғор усуллари билан танишиш имконига эга бўлдилар.
Технологиялар ривожланиши билан ахборот хизматлари учун сунъий интеллектнинг роли ортиб бормоқда. Йиғилишда сунъий интеллектнинг ижтимоий тармоқларда фейк маълумотлар ва дезинформация тарқатилишидаги салбий жиҳатлари муҳокама қилинди. Шунингдек, сунъий интеллект ёрдамида шундай маълумотларни аниқлаш ва уларга қарши курашиш борасидаги ижобий имкониятлар ҳақида ҳам фикр алмашилди.
Замонавий фото ва видеотасвирга олиш усуллари ҳам йиғилишнинг муҳим мавзуларидан бири бўлди. Ахборот хизматлари ходимлари замонавий медиа воситалардан фойдаланиш ва суратга олиш техникасини такомиллаштириш бўйича амалий машғулотларда қатнашдилар. Замонавий ускуналар ёрдамида самарали фото ва видео контент яратиш орқали аудитория эътиборини жалб қилиш ва ахборотни тўғри етказиш борасида билимлар берилди.
Шунингдек, йиғилиш давомида сунъий интеллект технологияларининг монтаж ва график амалларда тутган ўрни ҳам муҳокама қилинди. Сунъий интеллект ёрдамида видеолар ва тасвирларни тез ва сифатли таҳрир қилиш, визуал контентни такомиллаштириш имкониятлари ўрганилди. Бу технологиялар ахборот хизматлари ходимларига нафақат контент яратиш жараёнини тезлаштириш, балки унинг визуал сифати ва таъсирчанлигини оширишга ҳам ёрдам беради. Қатнашчилар сунъий интеллект орқали аниқ ва аниқсизликлардан холи, профессионал даражадаги видео ва фото маҳсулотлар яратиш бўйича тажриба олишди.
Ўқув йиғини барча қатнашчилар учун фойдали ва самарали бўлди, Миллий гвардия фаолиятини ёритишда очиқлик ва профессионал ёндашувни кучайтириш йўналишида муҳим қадамлар ташланди.