Янгиликлар

Шу кунларда республикамизнинг барча ҳудудларида қатор ҳарбий-ватанпарварлик, кўнгилочар ва спорт тадбирлари ўтказилиб келинмоқда. Миллий гвардиянинг Самарқанд вилояти бўйича бошқармасида ҳам, тизимда хизмат олиб бораётган ҳарбийлар ва "Қўриқлаш" хизмати ходимларининг оила аъзолари учун очиқ эшиклар куни ташкил этилди.
Дастлаб, йиғилганларга вилоят “Баркамол авлод” болалар мактаби ўқувчилари ижросида концерт дастури намойиш этилди. Шундан сўнг, бошқарманинг ҳовлисида, майдон узра саф тортган аскарлар, ҳарбий техникалар ва қурол-аслаҳаларнинг кўргазмаси иштирокчиларни ўзига чорлади. Ҳарбий оркестрнинг мусиқа садолари остида бошланган тадбир қатнашчиларни анча руҳлантирди. Ходимларнинг жанговар чиқишлари эса барчада бирдек қизиқиш уйғотди.
Бундан ташқари, Наманган вилояти Учқўрғон туманидаги 46-сонли махсус мактаб-интернатда ҳам "Миллий гвардия ёшлар билан ҳамнафас" шиори остида ватанпарварлик тадбири ўтказилди.
Тадбир давомида гапириш ва эшитиш каби неъматлардан маҳрум бўлган ўқувчилар учун ҳарбий техника ва қурол-аслаҳалар намойиш этилди ҳамда улар ҳақида батафсил маълумот берилди. Бу саъй-ҳаракат ёш авлод қалбида ватанпарварлик туйғусини шакллантириш ва уларга қувонч улашиш мақсадида амалга оширилди.
Шундан сўнг, Наманган вилояти "Қўриқлаш" бошқармаси ходимлари ўқувчиларга камондан отишнинг асосий қоидалари ва техникалари ҳақида тушунча бериб, амалда бажариш кўникмаларини ўргатдилар. Дарс жараёнида ўқувчилар ўзларининг мерганлик маҳоратларини намойиш этиш билан бирга, спортнинг ушбу туридан катта завқ олишди.
Тадбир ёшларнинг жисмоний тайёргарлигини ошириш билан бирга, уларда спортга бўлган қизиқишни кучайтиришга хизмат қилди. Шунингдек, иқтидорли ўқувчиларни аниқлаб, уларни келажакда профессионал спортга йўналтириш учун муҳим қадам сифатида баҳоланди.