Янгиликлар

Мамлакатимизда жиноятчилик ва ҳуқуқбузарликларнинг барвақт олдини олиш, жамоат тартибини сақлаш, жисмоний ва юридик шахслар мол-мулкларини ишончли қўриқловини таъминлаш Қўриқлаш хизматининг устувор вазифаларидан ҳисобланади. Бу борада тизим доимий такомиллаштирилиб, ходимлар учун муносиб меҳнат шароитини яратиб келинмоқда.
Фарғона вилояти Қўриқлаш бошқармаси Қува тумани қўриқлаш бўлимининг барча қулайликларга эга, энг сўнгги русумдаги замонавий техникалар билан жиҳозланган янги маъмурий биносининг фойдаланишга топширилиши ҳам шулар жумласидандир.
Тантанали очилиш маросимида Фарғона вилояти ҳокими Хайрулло Бозоров, Ички ишлар бошқармаси раҳбарияти, ҳуқуқни муҳофаза қилувчи органлар масъуллари, кенг жамоатчилик вакиллари ҳамда туташ маҳалла фаоллари иштирок этишди. Тантанали тадбирда сўз олганлар бугунги кунда Қўриқлаш хизмати томонидан халқ манфаатлари йўлида амалга оширилаётган ишлар, маҳаллаларда жиноятчиликнинг олдини олишдаги йўналишидаги тизимнинг алоҳида аҳамияти айтиб ўтишди.
Тадбирда жамоат тартибини сақлаш, фуқаролар хавфсизлигини таъминлаш ва жиноят ҳамда ҳуқуқбузарликларнинг олдини олишда фидокорлик кўрсатаётган бир гуруҳ ходимлар тақдирланди.
Шунингдек, хизмат билан самарали ҳамкорлик ўрнатган ташкилот вакилларига турли даражадаги қимматбаҳо совғалар ҳамда фахрий ёрлиқлар топширилди.
Шундан сўнг, мутасадди раҳбарлар ва меҳмонлар томонидан рамзий алвон ленталар қирқилди. Ташриф буюрганлар янги бинолардаги катта ва ёруғ хизмат хоналари, жисмоний ва жанговар тайёргарликларини ошириб бориш учун ташкил этилган спорт заллари, барча зарурий тиббий воситалар ва анжомлар билан тўлдирилган тиббиёт ва руҳий енгиллик хоналари, зиё маскани бўлмиш кутубхоналар ва мерганлик маҳоратларини ошириш учун электрон ўқ отиш хоналари билан яқиндан танишдилар.
Шубҳасиз эндиликда ушбу биноларда ходимлар касбий ва жисмоний маҳоратларини ошириб, Қўриқлаш хизмати сифатини янада такомиллаштиришади.