Yangiliklar

Kuni kecha Qashqadaryo viloyati Qoʻriqlash boshqarmasida barcha shahar-tumanlar Qoʻriqlash boʻlimlari xodimlari ishtirokida xizmat intizomni mustahkamlash, jinoyatchilikning oldini olish va huquqbuzarliklar profilaktikasiga qaratilgan videoselektor uchrashuvi boʻlib oʻtdi.

Tadbirda shaxsiy tarkib orasida sodir etilishi mumkin boʻlgan salbiy holatlarning oldini olish, korrupsiya va firibgarlik jinoyatlariga qarshi kurashish masalalari yuzasidan Qoʻriqlash Departamenti masʼullarining fikr-mulohazalari tinglandi. Joriy yilning oʻtgan davri mobaynida aniqlangan intizom buzilishlar va ularga nisbatan koʻrilgan chora-tadbirlar haqida soʻz yuritilib, bunday holatlarga yoʻl qoʻymaslik, xizmatni belgilangan tartibda tashkil etish muhimligi taʼkidlandi.

Shuningdek, uchrashuvda xodimlarning maʼnaviy saviyasi va intellektual salohiyatini yanada yuksaltirishni taʼminlash, beparvolik muhitiga barham berish, tarbiyaviy ishlar koʻlamini kengaytirish yuzasidan masʼul ofitserlarga tegishli koʻrsatma va tavsiyalar berildi. Yakunda shaxsiy tarkib oʻzlarini qiziqtirgan savollari va masalalari yuzasidan boshqarma rahbariyatidan batafsil javob va maʼlumotlar oldilar.